ဟိုးရှေးရှေးတုန်းက လယ်သမားလင်မယားရှိသတဲ့ ။ အဲဒီလင်မယားနှစ်ယောက်မှာ သားသုံးယောက်ရှိသတဲ့ ။ အဲဒီသုံးယောက်ထဲက အကြီးနှစ်ယောက်ကတော့ အင်မတန်မှ ဥာဏ်ကောင်းတဲ့အတွက် အဖေ အမေတွေက အင်မတန်မှချစ်ပြီး အမြဲ သူတို့အကြိုက် စားဖွယ်သောက်ဖွယ်တွေနဲ့ ဖွယ်ဖွယ်ရာရာ ချက်ကျွေးလေ့ရှိသတဲ့ ။ အဝတ်အစားဆိုလို့ရှိရင်လည်း လှလှပပ ဆင်ယင်ပေးသတဲ့ ။ ဒါပေမယ့် အငယ်ဆုံးသားလေး အီဗန် ကတော့ ဥာဏ်မကောင်းတဲ့ ထုံအအလေးလဲဖြစ် ညစ်ညစ်ပတ်ပတ်လဲနေတော့ ချစ်လဲမချစ် ၊ ဂရုလဲမစိုက်ပဲ အရူးကလေးလို့သတ်မှတ်ထားကြသတဲ့ ။
တစ်နေ့တော့ သူတို့နိုင်ငံကိုအုပ်ချုပ်တဲ့ ဇာဘုရင်ကြီးက သူမိုးပျံသဘောင်္တစ်စင်းအလိုရှိတဲ့အကြောင်း မင်းချင်းတွေကို ကြေငြာမောင်းခတ်စေပြီး မိုးပျံသဘောင်္ကိုတည်ဆောက်နိုင်တဲ့ သူကိုလဲ တိုင်းပြည်တစ်ဝက်ကိုအုပ်ချုပ်ခွင့်ပေးရုံမက သူ့ရဲ့ ချစ်မြတ်နိုးလှတဲ့ သမီးတော် မင်းသမီးလေးနဲ့ပါလက်ဆက်ပေးမယ်လို့ အမိန့်ထုတ်ပြန်လိုက်သတဲ့ ။
လယ်သမားရဲ့ သားအကြီးနှစ်ယောက်ကလဲ အဲဒီမိုးပေါ်ပျံနိုင်တဲ့ သဘောင်္ကို တည်ဆောက်ကြည့်ကြမယ်လို့ ဆုံးဖြတ်ပြီး ကံစမ်းကြည့်ကြဖို့ဆုံးဖြတ်လိုက်ကြသတဲ့ ။ သူတို့အမေကလဲ သားနှစ်ယောက်အတွက် စားသောက်ဖွယ်တွေ ကြက်ကင် ငန်းကင်တွေသာမက အောင်မြင်စေကြောင်းဆုမွန်ကောင်းတောင်းပေးလိုက်ပြီး သားကြီးနှစ်ယောက်လဲ ခရီးစထွက်ခဲ့ကြသတဲ့ ။
ညီအစ်ကိုနှစ်ယောက်လဲ သစ်တောရှိရာကိုသွားကြပြီး သဘောင်္ကြီးဆောက်ဖို့ စပြီးသစ်ပင်တွေခုတ်ကြသတဲ့။ သူတို့ဟာ သစ်ကိုင်းတွေအမြားအပြားခုတ်လို့လဲပြီးရော သစ်ကိုင်းတွေနဲ့ဘာဆက်လုပ်ရမှန်းအကြံဥာဏ်မရှိတော့တဲ့အတွက် ဒေါသထွက်လာကြပြီး တစ်ယောက်နဲ့တစ်ယောက် အပြစ်တင်ကြိမ်းမောင်းနေကြသတဲ့ ။ အဲဒီအချိန်မှာပဲ သူတို့အနားမှာ အဘိုးအိုတစ်ဦး ရှိနေတာကို သတိထားလိုက်မိကြသတဲ့ ။
အဲဒီအဘိုးအိုက “ဘာလို့ တစ်ယောက်နဲ့တစ်ယောက် ဆူပူကြိမ်းမောင်းနေကြသလဲ သူငယ်လေးတို့”လို့ လှမ်းမေးသတဲ့ ။ အလုပ်ပင်ပန်းပြီးဒေါသထွက်နေတဲ့ညီအစ်ကိုနှစ်ယောက်က လည်း “ ဟာ ဒီသူတောင်းစားကြီး အလုပ်များရတဲ့အထဲ ဝေးဝေးသွားစမ်းပါ” လို့မခြေမငံပြန်ပြောလိုက်ကြသတဲ့ ။
ဒီလိုနဲ့ ရက်အနည်းငယ်အကြာမှတော့ သားအကြီးနှစ်ယောက်ဟာ အကြံဥာဏ်ကုန်ပြီးအိမ်ပြန်ရောက်လာကြသတဲ့ ။ သူတို့ပြန်ရောက်လာပြီးမကြာခင်မှာပဲ အငယ်ဆုံးသား အရူးလေးအိုင်ဗန်ကလဲ သူ့မိဘတွေကို သူလဲကံစမ်းပြီး စမ်းကြိုးစားခွင့်ပြုဖို့ မိဘတွေကိုတောင်းပန်သတဲ့ ။
အိုင်ဗန်လေးရဲ့အမေကလဲ “သား မင်းဟာ ဒီလောက်ကြီးကျယ်တဲ့အလုပ်မျိုးဘယ်တော့မှလုပ်နိုင်မှာမဟုတ်ဘူး ။ တောထဲမှာ တိရိစ္ဆာရိုင်းတွေ အန္တရာယ်ပြုလို့ လမ်းမှာ အသက်ဆုံးတာပဲအဖတ်တင်မယ် ” လို့ပြောသတဲ့။
ဒါပေမယ့် ဇွဲကောင်းလှတဲ့အိုင်ဗန်လေးကတော့ အတင်းတောင်းပန်ပြီးနောက်ဆုံးမှာ အိမ်ကနေစတင်ထွက်ခွာလာသတဲ့။ ဒီတစ်ခါမှာတော့ အိုင်ဗန်လေးရဲ့အမေက မာကျောတဲ့ ပေါင်မုန့်ထူထူတစ်ချပ်သာ လမ်းမှာစားဖို့ပေးလိုက်သတဲ့။
တောအုပ်ကိုရောက်တဲ့အခါ အိုင်ဗန်လေးဟာ ထင်းရူးပင်ကြီးတစ်ပင်ကို ခုတ်လှဲလိုက်ပြီး မိုးပျံသဘောင်္ကိုစပြီးတည်ဆောက်ဖို့ကြိုးစားသတဲ့ ။ အဲဒီအချိန်မှာပဲ အစ်ကိုကြီးနှစ်ယောက်နဲ့တွေ့ခဲ့တဲ့အဘိုးအိုဟာ ရောက်လာပြန်သတဲ့ ။
“သူငယ်လေး မင်းဒီမှာ ဘာများလာလုပ်နေပါသလဲ ”လို့ အဘိုးအိုက စမေးသတဲ့။ အိုင်ဗန်လေးကလဲ “ မိုးပျံသဘောင်္တစ်စီးဆောက်ဖို့ကြိုးစားနေပါတယ် အဘိုးရယ် ”လို့ အမှန်တိုင်းပဲပြောလိုက်သတဲ့။ အဲဒီအခါ အဘိုးအိုက “ဟာ ဒီလို အရာမျိုးဆိုတာ အင်မတန်မှ တည်ဆောက်ဖို့ခက်ခဲတဲ့အရာပဲ ”လို့ ရေရွတ်သတဲ့ ။ အိုင်ဗန်လေးကလဲ “ အဘိုးတို့လို လူကြီးသူမဆိုတာ အင်မတန်မှ ဥာဏ်အမြော်အမြင်နဲ့ပြည့်စုံပါပေတယ် ။ ကျေးဇူးပြုလို့ အကြံကောင်းဥာဏ်ကောင်းလေးများ မစပါလို့ ”တောင်းပန်သတဲ့ ။
ဒါနဲတင် ထူးဆန်းတဲ့အဘိုးအိုက အိုင်ဗန်လေးကို မိုးပျံသဘောင်္ ဘယ်လိုတည်ဆောက်ရမယ်ဆိုတာ ပြောပြလိုက်တာ အိုင်ဗန်လေးဟာ မိုးပျံသဘောင်္ကို အခက်အခဲမရှိ လွယ်ကူစွာပဲ တည်ဆောက်နိုင်သွားသတဲ့ ။ အဘိုးအိုဟာ အိုင်ဗန်လေးကို အင်မတန်မှာချီးကျူးပြီး အစားအသောက်များလဲပေးသတဲ့ ။
အိုင်ဗန်လေးကလဲ “ အဘိုးရယ် .. ကျွန်တော့်မှာတော့ ဟောဒီ မာလွန်းတဲ့ ပေါင်မုန့်ခြောက်ကြီးပဲ ကျွေးစရာပါ ပါတယ်” လို့ ဝမ်းပန်းတနည်းပြောသတဲ့ ။ အဘိုးအိုကလဲ “ ကိစ္စမရှိပါဘူး .. ပေးသာပေးပါ” လို့ပြောပြီးပေးလိုက်တဲ့အခါ မာကြောတဲ့ပေါင်မုန့်ခြောက်ဟာ အဘိုးအိုလက်နဲ့ထိလိုက်တာနဲ့ အင်မတန်မွှေးကြိုင်သန့်ရှင်းပြီး လတ်ဆတ်တဲ့ပေါင်မုန့် တွေဖြစ်ကုန်သတဲ့ ။
စားသောက်ပြီးကြတဲ့အခါ အဘိုးအိုက အီဗန်လေးကို ဒီမိုးပျံသဘောင်္ကိုဘယ်လိုမောင်းနှင်ရမယ်ဆိုတာ ပြောပြပြီး လမ်းမှာတွေ့တဲ့ သူတွေကိုလဲ ခရီးကြုံခေါ်တင်သွားပါလို့ အကြံပေးလိုက်သတဲ့ ။ အိုင်ဗန်လေးကလဲ အဘိုးအိုရဲ့စကားကို လေးလေးစားစားမှတ်သားထားပြီး စခရီးထွက်လာခဲ့သတဲ့ ။ သူမိုးပျံသင်္ဘောကိုထိုင်လိုက်တယ်ဆိုရင်ပဲ သဘောင်္ကြီးဟာ ပျံထွက်သွားလိုက်တာ သစ်ပင်တွေ ချောင်းတွေ လယ်ကွင်းတွေဆိုတာ ဟိုးအဝေးမှာ ကျန်ရစ်ခဲ့သတဲ့ ။ တော်တော်လေးပျံလာတယ်ဆိုရင်ပဲ အီဗန်ဟာ တစ်နေရာမှာ လူတစ်ယောက်ဟာ မြေပြင်မှာဒူးထောက်ပြီး နားကိုမြေကြီးနဲ့ကပ်ပြီး နားထောင်နေတာကို တွေ့ရသတဲ့ ။ အီဗန်လေးဟာ အရမ်းကိုထူးဆန်းသွားပြီး ဒီလူဘာများလုပ်နေပါသလဲလို့မေးကြည့်မိသတဲ့။
“နောင်ကြီးရယ် .. နားနှစ်ဘက်ကိုမြေကြီးနဲ့ကပ်ပြီးဘာများလုပ်နပါသတုန်း ”လို့မေးလိုက်တဲ့အခါ အဲဒီလူထူးဆန်းက “ဟိုးတောင်ပိုင်းက ငှက်တွေရဲ့တေးဆိုသံကို နားထောင်နေတာပါ လို့ဖြစ်သတဲ့ ။ ဆက်ပြီး သူဟာ ဒါတင်မက တစ်ကမ္ဘာလုံးမှာဖြစ်ပျက်ပြောဆိုနေတဲ့အသံအားလုံးကိုကြားနိုင်တယ်လို့ ပြောလိုက်သတဲ့ ။အီဗန်လေးကလဲအံ့သြသွားပြီး အဲဒီလူကို သူနဲ့ အတူ လိုက်ခဲ့ဖို့ခေါ်သတဲ့ ။ လူထူးဆန်းကလဲ သဘောတူလိုက်ပြီး အီဗန်လေးနဲ့အတူ ခရီးဆက်ထွက်လာကြသတဲ့ ။
သိပ်မကြာခင်မှာပဲ သူတို့ဟာမြေပြင်ပေါ်မှာနောက်ထပ်လူထူးဆန်းတစ်ယောက်ကိုထပ်တွေ့သတဲ့ ။ အဲဒီလူဟာ ခြေတစ်ဖက်ကို နားရွက်မှာချိတ်ပြီး ခြေတစ်ချောင်းထဲနဲ့ ခုန်ဆွဆွသွားနေတာတဲ့အတွက် အီဗန်လေးက ဘာကြောင့်များ ခြေတစ်ချောင်းထောက်ခုန်နေရသလဲလို့ မေးတဲ့အခါ အဲဒီလူက “အဲလိုသာခုန်မနေဘူးဆိုရင် ကျုပ် ဟာ ကမ္ဘာတစ်ဘက်ခြမ်းကို တစ်ထိုင်တည်းရောက်သွားမယ်”လို့ပြန်ဖြေသတဲ့ ။ အီဗန်လေးကလဲ “ကဲ ဒါဖြင့် ကျွန်တော်တို့နဲ့အတူလိုက်သာလိုက်ခဲ့ပါ”လို့ ဖိတ်ခေါ်လိုက်တဲ့အခါ အဲဒီခြေလှမ်းကျယ်လူကလဲ ခြေတစ်ချောင်းနဲ့ခုန်တက်လိုက်ပြီး ခရီးဆက်ထွက်လိုက်လာကြတာ ဘာမှမရှိတဲ့ ကောင်းကောင်ပေါ်ကို သေနတ်တစ်လက်နဲ့ချိန်နေတဲ့ လူတစ်ယောက်ကိုတွေ့တဲ့အထိပဲတဲ့ကွယ် ။
အဲဒီလူက “ကျုပ်က ဒီရှေ့ ကီလိုမီတာတစ်ထောင်လောက်အကွာက သစ်ကိုင်းမှာနားနေတဲ့ ကြက်မကို ပစ်မလို့ချိန်နေတာပါ” လို့ဖြေတဲ့အတွက် အိုင်ဗန်လဲ ခေါ်လာလာခဲ့ပြန်သတဲ့။ ဒီလိုနဲ့ အဆုံးအစမရှိတဲ့ကောင်းကင်ကြီးထဲမှာ ဆက် ခရီးထွက်လာလိုက်ကြတာ တစ်နေရာလဲရောက်ရော ကျောပေါ်မှာ ပေါင်မုန့်တွေ တစ်ခြင်းကြီးအပြည့်ထမ်းထားတဲ့ လူတစ်ယောက်ကိုတွေ့သတဲ့ ။ အီဗန်လေးကလဲ ဘယ်များသွားမလို့ပါလဲလို့မေးတဲ့အခါ အဲဒီလူက မြို့မှာ ညစာသွားဝယ်မလို့လို့ဖြေသတဲ့ ။ အိုင်ဗန်လေးလဲအံ့သြသွားပြီး “ကျောပေါ်မှာ ပေါင်မုန့်တွေအပြည့်ရှိနေရက်နဲ့ ဘာလို့များသွားဝယ်ရဦးမှာလဲ”လို့မေးသတဲ့ ။ အဲဒီလူကလဲ “ ဒါဘာဟုတ်သေးလို့လဲ ကျုပ်တကယ်ဆာလာတဲ့အခါ အဲဒီပေါင်မုန့်အကုန်လုံးကိုတစ်လုပ်ထဲစားနိုင်ပါတယ် လို့ပြန်ဖြေသတဲ့ ။ အိုင်ဗန်လဲထုံးစံအတိုင်းသူတို့နဲ့လိုက်ခဲ့ဖို့ ခေါ်ခဲ့ပြန်သတဲ့ကွယ်။
ဒီလိုနဲ့ ဆက်ပျံလာလိုက်တာမကြာခင်မှာပဲ ရေကန်တစ်ကန်ကို တစ်ပတ်ပြီးတစ်ပတ် ပတ်လျောက်နေတဲ့လူတစ်ယောက်ကိုထပ်တွေ့ပြန်သတဲ့ ။ အိုင်ဗန်လေးလဲ “ဘာကြောင့်များရေကန်ကို တစ်ပတ်ပြီးတစ်ပတ်ပတ်နေရတာလဲ”လို့မေးသတဲ့ ။ အဲဒီလူကလဲ သူရေသိပ်ဆာနေလို့ ရှာနေပေမယ့် ဘယ်လိုမှရေမတွေ့ဘူးဖြစ်နေတယ်လို့ဖြေသတဲ့ ။ အိုင်ဗန်ကလဲ ရေကန်ကြီးတစ်ကန်လုံးရှေ့မှာရှိနေတာပဲ သောက်လိုက်ပါလားလို့ ပြောသတဲ့ ။ အဲဒီလူကလဲ သူ့အတွက်တော့ဒီရေကန်ဟာ တစ်ငုံစာပဲရှိပြီး ဒီရေကန်ထဲကရေအကုန်သောက်ပြီးရင်တောင်ရေထပ်ဆာနေတုန်းပဲလို့ပြောသတဲ့ ။ဒါနဲ့ အီဗန်လေးလဲ အဲဒီလူကိုအတူလိုက်ဖို့ ဖိတ်ခဲ့တဲ့အတွက် အဲဒီလူကလဲ သဘောင်္ကြီးနဲ့လိုက်လာခဲ့သတဲ့ ။
မိုးပျံသဘောင်္ကြီးလဲဆက်ပျံလာလိုက်တာ တစ်နေရာရောက်တော့ ကျောပေါ်မှာ ထင်းတွေအပြည့်သယ်ပိုးပြီး တောအုပ်ထဲကိုသွားနေတဲ့လူတစ်ယောက်ကိုတွေ့ပြန်သတဲ့ ။ ထုံးစံတိုင်းအီဗန်လေးကလဲ မေးပြန်တာပေါ့။ ဒီတော့ အဲဒီလူက ဒီသစ်ကိုင်းခြောက်တွေဟာ သာမန်သစ်ကိုင်းတွေမဟုတ်ကြောင်း ၊ ဒီသစ်ကိုင်းတွေကို တောအုပ်ထဲက မြေကွက်လပ်တစ်ခုမှာကျဲချလိုက်တာနဲ့ စစ်တပ်ကြီး ရုတ်ချည်းပေါ်လာနိုင်ကြောင်းပြောသတဲ့။ ထုံးစံတိုင်းဒီလူကိုလဲ အီဗန်လေးက အတူလိုက်ဖို့ခေါ်လာတာပေါ့။
နောက်တစ်နေရာလဲရောက်ရောကျောပေါ်မှာမြက်ထုံးတွေသယ်ပိုးထားတဲ့ လူတစ်ယောက်တွေ့ပြန်ပါရောတဲ့ကွယ် ။ အဲဒီမြက်တွေကလဲ သာမန်ရိုးရိုးမြက်တွေမဟုတ်ပြန်ဘူးတဲ့ ။ ဘယ်လောက်ပူပြင်းခြောက်သွေ့နေပါစေ အဲဒီမြက်တွေကိုသာကျဲချလိုက်မယ်ဆိုရင် ချက်ခြင်း မြူနှင်းတွေကျလာပြီး လေပြည်လေးတွေတိုက်ခတ်လာနိုင်သတဲ့ကွယ် ။ အဲဒီလူကတော့ အီဗန်လေးနဲ့အတူလိုက်လာတဲ့နောက်ဆုံးလူပဲတဲ့ကွယ် ။
ဒီလိုနဲ့ခရီးဆက်လာလိုက်ကြတာ နောက်ဆုံးမှာတော့ ဇာဘုရင်ရဲ့နန်းတော်ကြီးကိုရောက်သွားကြသတဲ့ ။ အဲဒီအချိန်မှာဘုရင်ကြီးက မနက်စာ စားတော်မူနေတုန်းတဲ့ ။ နန်းရင်ပြင်မှာပျံဝဲလာတဲ့ မိုးပျံသဘောင်္ကြီးကိုလဲမြင်ရော ဘုရင်ကြီးက သူ့အမှုထမ်းတွေကို ဒီသဘောင်္ကိုမောင်းနှင်လာသူက ဘယ်သူလိုဆိုတာ ချက်ခြင်းစုံစမ်းစေသတဲ့ ။ မင်းချင်းတွေလဲ စုံစမ်းလိုက်တဲ့အခါ ရောက်ရှိလာသူဟာ သာမန် လယ်သမားသားတစ်ဦးဖြစ်ပြီး မင်းမျိုးမင်းနွယ်မဟုတ်တာလဲသိရော အင်မတန်မှာကိုစိတ်ပျက်သွားသတဲ့ ။ သူ့စိတ်ထဲမှာလဲ တော်ဝင်သွေးမဟုတ်တဲ့ လယ်သမားသားနဲ့ သူ့ချစ်လှစွာသောသမီးတော်လေးကို ဘယ်လိုမှပေးစားလို့မဖြစ်ဘူးလို့ တွေးမိသတဲ့ ။ ဒါနဲ့ မူးမတ်တွေကိုတိုင်ပင်ကြည့်တဲ့အခါ မူးမတ်တွေက ဒီလိုအကြံပေးလိုက်ကြသတဲ့ ။
“အရှင်မင်းကြီး ဒီလယ်သမားသားကို ဘယ်လိုမှမဖြစ်နိုင်အောင်ခက်ခဲတဲ့အလုပ်တွေသာခိုင်းလိုက်ပါ ။ ဒါဆိုသူလမ်းခရီးမှာသာ အသက်ဆုံးရှုံးပြီး ဘယ်လိုမှပြန်လာနိုင်မှာမဟုတ်တော့ပါဘူး” လို့လျောက်တင်ကြသတဲ့ ။ ဒါနဲ့ ဘုရင်ကြီးလဲ အီဗန်လေးကို အသက်ရှင်စေတဲ့ရေနဲ့ သေစေတဲ့ရေထည့်ထားတဲ့ ရေတကောင်းနှစ်ခုကို သူမနက်စာစားလို့မပြီးခင်အတွင်း အရောက်ရအောင်ယူလာရမယ်လို့ အမိန့်ပေးလိုက်သတဲ့ ။ ဘယ်လိုမှမဖြစ်နိုင်တဲ့အတွက်အီဗန်လေးကလဲ အင်မတန် တုန်လှုပ်သွားသတဲ့ ။ ဒီမှာပဲ သူခေါ်လာတဲ့ ခြေလှမ်းကျယ်လူက ဘာမှမစိုးရိမ်ပါနဲ့ လူငယ်လေး ကျုပ် မိနစ်ပိုင်းအတွင်းရအောင်ယူပေးပါ့မယ်လို့ ကတိပေးပြီး သူ့နားရွက်မှာချိတ်ထားတဲ့ခြေတစ်ဖက်ကိုဖြုတ် လှမ်းခုန်လိုက်တာမှာ တစ်ခါတည်း လူသူမရောက်နိုင်တဲ့လျို့ဝှက်မြို့တော်ကိုရောက်သွားပြီး ရေတကောင်းတွေကို တစ်ခါထဲယူလိုက်သတဲ့ ။ ဒါပေမယ့် အဲဒီအချိန်မှာပဲ သူက “ဟာ ငါ့မှာ ဒီလောက်အချိန်တွေအများကြီးပိုနေသေးတာပဲ ခဏလောက်အိပ်လိုက်ပါဦးမယ်လေ” ဆိုပြီး အနီးမှာရှိတဲ့ ဝက်သစ်ချပင်ကြီးအောက်မှာ အိပ်ပျော်သွားသတဲ့ ။
ဒီအချိန်မှာ နန်းတော်မှာတော့ ဘုရင်ကြီးက မနက်စာစားလို့ပြီးသွားတဲ့အထိ ခြေလှမ်းကျယ်လူပြန်မရောက်လာသေးတဲ့အတွက် အီဗန်လေးခမျာ အခက်အခဲကြုံနေရရှာသတဲ့ ။ ဒါနဲ့ ဘာမဆိုကြားနိုင်တဲ့နားရှိသူက မြေကြီးကိုနားကပ်ပြီးနားထောင်ကြည့်တဲ့အခါ ခြေလှမ်းကျယ်ရဲ့ ဟောက်သံကို အကျယ်ကြီးကြားရသတဲ့ ။ ဒါနဲ့ အဝေးကြီးက အရာတွေကို သေနတ်နဲ့ပစ်နိုင်သူက တစ်ခါတည်း နန်းတော်ကနေပြီး သေနတ်နဲ့ဝက်သစ်ချပင်ကိုပစ်ချလိုက်တာ အပင်ပေါ်က အသီးတွေပြုတ်ကျလာပြီး ခြေလှမ်းကျယ်လဲ လန့်နိုးသွားသတဲ့ကွယ် ။ ခြေလှမ်းကျယ်လဲတစ်ခါတည်း ခုန်ထလိုက်တာ ချက်ခြင်းပဲနန်းတော်ကိုပြန်ရောက်လာပြီး အသက်ရှင်စေတဲ့ရေနဲ့ သေစေတဲ့ရေ ကို ပေးလိုက်သတဲ့ ။
ဘုရင်ကြီးလဲ ရေတကောင်းနှစ်ခုကိုကြည့်ပြီး အစွမ်းထက်မထက်စမ်းကြည့်ဖို့စိတ်ကူးပေါက်သွားသတဲ့ ။ ဒါနဲ့ အစေခံတွေကို ကြက်ဖတစ်ကောင်ယူလာစေပြီး သေစေတဲ့ရေနဲ့ဖြန်းလိုက်ရာမှာကြက်ဖလဲ တစ်ခါတည်း အသက်ပျောက်သွားသတဲ့ ။ ဒါပေမယ့် အသက်ရှင်စေတဲ့ရေနဲ့လဲပြန်ဖြန်းလိုက်ရော အသက်ပြန်ရှင်လာသတဲ့ကွယ် ။
ပထမ အလုပ်ကိုအောင်မြင်သွားတာကြောင့် ဘုရင်ကြီးလဲ နောက်တစ်ခုထပ်ခိုင်းဖို့ကြံသတဲ့ ။ ဒုတိယတစ်ခုကတော့ ပိုပြီးမှတောင်ခက်ခဲသတဲ့ ။ ဘာလဲဆိုတော့ ကင်ထားတဲ့ နွားကြီးဆယ့်နှစ်ကောင်နဲ့ ဖုတ်ထားတဲ့ ပေါင်မုန့်ကြီး ဆယ့်နှစ်လုံးကို တစ်ထိုင်ထဲနဲ့ကုန်အောင်စားရမတဲ့ ။ အိုင်ဗန်လေးကလဲ “ဆယ့်နှစ်ကောင်မပြောနဲ့ နွားကြီးတစ်ကောက်ကိုတောင်တစ်ပတ်စားလို့မကုန်နိုင်ကြောင်း ပြောပြီးညည်းငြူသတဲ့ ။ ဒီအခါမှာအစားကြီးတဲ့လူက မပူပါနဲ့ ဒါလောက်များတော့ အဆာပြေရုံလောက်ပဲရှိပါတယ် ဆိုပြီး တစ်ခါတည်း စားလိုက်တာမှာ မလောက်လို့တောင်ထပ်တောင်းရသေးသတဲ့ ။
ဘုရင်ကြီးလဲတော်တော် စိတ်ပျက်သွားပြီး အစေခံတွေကိုခေါ် ဘီယာစည်ကြီးလေးဆယ်ထဲမှာ ဘီယာခွက်ကြီးလေးဆယ်လောင်းထည့်စေပြီး အဲဒီစည်လေးဆယ်ကို တစ်ခါတည်း အပြီးသောက်ပြရမယ်လို့ခိုင်းပြန်သတဲ့ ။ ဒီတစ်ခါလဲ စိတ်ပျက်လက်ပျက်ဖြစ်နေတဲ့အီဗန်လေးကို ကယ်မဲ့လူပေါ်လာပြန်သတဲ့ ။ သူကတော့ ရေသောက်ကြီးသူပါပဲ ။ သူက ဒါလေးများ တစ်ခါသောက်ပဲရှိပါသေးကော ။ ဒါသောက်ပြီးရင်တောင် ထပ်ထည့်ဖို့ ဗိုက်ထဲမှာနေရာရှိပါသေးတယ်လို့ ပြောပြီးသောက်ပြလိုက်သတဲ့ ။
နောက်ဆုံးတော့ ဘုရင်ကြီးလဲ နောက်ထပ်အကြံအဖြစ် သံအိုးကြီးကို ဖြူသွားတဲ့အထိ ပူသွားအောင် မီးအပူပေးပြီး အဲဒီရေနွေးအိုးထဲမှာ တစ်ည နေပြရမယ်လို့အီဗန်လေးကိုခိုင်းသတဲ့ ။ စိတ်ထဲမှာလဲ ဒီတစ်ခါတော့ တစ်ခါတည်း အသက်ပျောက်ပြီး ကိစ္စပြတ်ပြီပဲလို့ တွေးမိသတဲ့ ။
ဒီတစ်ခါတော့အီဗန်လေးက သူနဲ့အတူ မြက်ထုတ်နဲ့လူကို ခေါ်သွားလိုက်တာ အထဲလဲရောက်ရော မြက်ထုတ်နဲ့လူက မြက်တွေကိုကျဲချလိုက်တဲ့အတွက် ရေပူတွေဟာ အေးကုန်ပြီး တစ်ခါတည်း ရေတွေခဲသွားလိုက်တာ အီဗန်လေးခမျာ မျက်နှာသစ်ဖို့ရေတောင် ကမန်းကတန်းယူလိုက်ရသတဲ့ ။ နောက်နေ့မနက်မိုးလင်းလို့ အိုးကြီးလဲဖွင့်လိုက်ရော အီဗန်လေးက လန်းလန်းဆန်းဆန်းနဲ့ အိုးထဲကထွက်လာတာတွေ့ကြရတာပေါ့ကွယ် ။
ဒါနဲ့နောက်ဆုံးအဖြစ် ဘုရင်ကြီးက အီဗန်လေးကို နောက်နေ့မနက်မတိုင်ခင် စစ်တပ်ကြီးတစ်ခု ဖန်ဆင်းပေးရမယ်လို့ တောင်းဆိုလိုက်သတဲ့ ။ သူ့စိတ်ထဲမှာလဲ အီဗန်လို လယ်သမားသားအဖို့ ဒီလောက်အချိန်တိုအတွင်း စစ်တပ်ကြီးဖွဲ့စည်းဖို့ဆိုတာ ဘယ်လိုနည်းနဲ့မှမဖြစ်နိုင်ဘူးလို့ တွေးပြီး ဒီတစ်ခါတော့ အီဗန်လေးရှုံးပြီလို့တွက်နေသတဲ့ ။
အီဗန်လဲဒီတစ်ခါတော့ ဘယ်လိုမှမဖြစ်နိုင်တော့ဘူးလို့လက်မှိုင်ချနေတုန်း ထင်းခြောက်သယ်တဲ့လူက ထွက်လာပြီး “လူငယ်လေး မင်း ကျုပ်ကိုမေ့နေတာပဲ ကျုပ်သာ ထင်းခြောက်တွေကျဲလိုက်ရင် မျက်စိတစ်မှိတ်တွင်း စစ်တပ်ကြီးပေါ်လာနိုင်ပါတယ် ။ တကယ်လို့ ဒါတောင်မှဘုရင်ကြီးက သူ့သမီးတော်ကိုမပေးရင် အဲဒီစစ်တပ်နဲ့ ဒီတိုင်းပြည်ကို တိုက်ခိုက်ပြီးသိမ်းပိုက်ပစ်မယ်လို့” ပြောလိုက်သတဲ့။
ဒါနဲ့ နောက်နေ့မနက်လဲရောက်ရော အီဗန်ဟာ သစ်ကိုင်းခြောက်တွေကို မြက်ပြင်မှာကျဲလိုက်တာ တစ်မဟုတ်ချင်း စစ်တပ်ကြီးပေါ်လာသတဲ့ ။ ဘုရင်ကြီးအိပ်ရာနိုးတဲ့အခါ နန်းတော်အဝမှာ အလံတလူလူ စစ်ရေးတပြင်ပြင်နဲ့ကြီးမားလှတဲ့စစ်တပ်ကြီးကိုတွေ့လိုက်ရတဲ့အတွက် အင်မတန်မှတုန်လှုပ်သွားပြီး တစ်ခါတည်း သူ့စစ်တပ်တွေကို ခေါ်ထုတ် စစ်ပွဲကြီးဆင်နွဲစေသတဲ့ ။ ဒါပေမယ့်နောက်ဆုံးမှာ အီဗန်လေးရဲ့တပ်တွေက အနိုင်ရသွားပြီး စစ်သားတွေဟာ နန်းတော်ထဲကိုထိုးဖောက်လာနိုင်ကြသတဲ့ ။ဒီတော့မှ ဘုရင်ကြီးလဲကြောက်လန့်ပြီး အီဗန်လေးကိုဒူးထောက်တောင်းပန်ကာ မင်းသမီးလေးကိုလက်ထပ်ဖို့ တောင်းဆိုသတဲ့ ။
ကောက်ကျစ်လှတဲ့ဘုရင်ကြီးရဲ့စကားကို ဒီတစ်ခါတော့အီဗန်လေးက မနာခံတော့ပဲ တစ်ခါတည်း ဘုရင်ကြီးကိုတိုင်းပြည်ကနှင်ထုတ်လိုက်သတဲ့ ။ ဒီနောက်မှာတော့ မင်းသမီးလေးနဲ့လက်ဆက်ပြီး တိုင်းပြည်ကြီးကို အင်မတန်မှဥာဏ်ပညာပြည့်ဝစွာနဲ့ စီရင်အုပ်ချုပ်တော်မူသတဲ့ ။ အီဗန်လေးကိုလဲ ဘယ်သူကမှအရူးလေးအီဗန်လို့ မခေါ်ကြတော့ဘူးတဲ့ကွယ် ။
ဘုရင်ကြီးအီဗန်ကိုလဲ တိုင်းသူပြည်သားများကအင်မတန်မှလေးစားချစ်ခင်ကြသတဲ့ ။ မင်းသမီးလေးကတော့ပိုလို့အချစ်ဆုံးဖြစ်ပြီး အီဗန်လေးနဲ့အတူ အသက်ထက်ဆုံးပျော်ရွင်စွာ ပေါင်းသင်းနေထိုင်သွားကြသတဲ့ကွယ် ။
ဘာသာပြန်မူပိုင်- ချစ်ခြင်းခြေရာ
